Það verður ekki betur séð en að lögmönnunum Gesti Jónssyni og Ragnari Hall hafi orðið illa á í messunni í Al Thani réttarhöldunum.

Þeir eru með reyndustu lögmönnum á Íslandi og enginn frýr þeim vits.

En þarna komu þeir fram með hroka. Það var nánast eins og lögmennirnir – og sakborningarnir að hluta til – viðurkenndu ekki dómstólinn, líkt að það sem þar fór fram væri fyrir neðan virðingu þeirra.

Svo sögðu þeir Gestur og Ragnar sig frá málinu með fordæmalausum hætti. Þeir eru ávítaðir fyrir þetta í dómnum og sektaðir.

Nú er auðvitað ljóst að auðmenn sem eru ásakaðir fyrir fjármálamisferli og -brot eiga rétt á málsvörn. Þeir virðast flestir hafa efni á að kaupa sér þjónustu færustu lögfræðinga. En yfirlæti og hroki er engum til framdráttar.