Það er merkilegt hvað er hægt að gera mikið veður út af fótboltaleikum, á tímanum þegar hvorki leikmenn né boltinn eru inni á vellinum.

Þetta var reyndar ekki alltaf svona – einu sinni var nokkurn veginn látið nægja að lýsa því sem gerðist í leiknum sjálfum.

Nú finnst manni nánast eins og það sem skeður utan hans sé jafn mikilvægt, hið eilífa umtal um heilsufar fótboltamanna og einhverjar smávægilegar yfirsjónir þeirra.

Einn hallærislegasti uppsláttur sem maður hefur séð í íslenskum fjölmiðli nýskeð er „fréttin“ um að leikmenn króatíska landsliðsliðsins í fótbolta hafi fengið sér nokkra bjóra eftir leikinn á föstudaginn – á Hótel Grand.

Nú má vel vera að þetta hafi gerst, það er staðhæft á einum stað, á öðrum stað er þetta dregið til baka, hótelstjórinn á Grand segir að þeir hafi fengið sér gos og samloku.

Hvaða máli skiptir þetta? Ekki urðu þeir sér til skammar á hótelinu, rifu upp klósettsetur eða hentu sjónvörpum út um gluggann. Það fer engum sögum af ólátum. Eða mun þetta ráða úrslitum um getu Króatanna í leiknum á morgun? Voru það bjórarnir á Grand sem skiptu sköpum?

Og þurfti íslenskur blaðamaður að spyrja króatíska þjálfarann að þessu á blaðamannafundi í Zagreb? Hann þarf kannski að fylla sína dálksentímetra og fá fleiri smelli á netinu.

En smekklegt er þetta ekki.