Þórður Víkingur Friðgeirsson er lektor við Háskólann í Reykjavík og kennir þar meðal annars námskeið í áætlunargerð og áhættustjórnun. Hann hefur gefið út bók á þessu sviði sem nefnist Áhætta, ákvarðanir og óvissa.

Þórður skrifar á Facebook-síðu sína um tillögur hagræðingarnefndar – kannski er þarna kominn kjarni máls um þær?

„Segjum að þessi hagræðingarhópur hefði verið að vinna fyrir einkafyrirtæki sem hefði beðið um úttekt á hvar mætti hagræða í rekstri. Ég velti fyrir mér hvað slíkt fyrirtæki hefði verið til í að borga fyrir þessa löngu upptalingu? Engin forgangsröðun, engir útreikningar, ekkert mat á flækjustigi eða áhættu. Engin flokkun í grúppur eða tengingar við verkefni. Þessu til viðbótar kæmist einkafyrirtækið að því að stór hluti þessarar upptalningar væri kominn í framkvæmd áður en listinn kom fram.

Ég veit það ekki en ég held að þótt ásetningurinn væri góður væri einkafyrirtæki ekki tilbúið að greiða mikið fyrir þetta, því miður.“