Ef rétt er skilið ætlar Jón Gnarr ekki að gefa aftur kost á sér til setu í borgarstjórn.

Það er að sumu leyti smart – gjörningnum sem hófst í upphafi árs 2010 er hreinlega lokið. Hann heppnaðist fáránlega vel.

En Jón skilur eftir sig tómarúm. Án hans er Besti flokkurinn ekki neitt. Viðbúið er að aðrir meðlimir hópsins hætti líka.

Hins vegar má búast við því að Björt framtíð – sem varð að nokkru leyti til upp úr Besta flokknum – reyni að hasla sér völl í borgarstjórninni.

Með þokkalegum frambjóðendum á sá flokkur ágæta möguleika í borgarstjórnarkosningum. En flokkur sem fékk 8 prósent í alþingiskosningum mun seint ná hæðum Besta flokksins, þá þarf eitthvað mikið að koma til.

Um leið hlýtur að fara straumur um fulltrúa gömlu flokkanna sem eiga sæti í borgarstjórninni, Samfylkingar, Sjálfstæðisflokks og VG. Þarna er allt í einu möguleiki á að endurheimta fylgið sem Jón Gnarr hefur tekið.

Samkvæmt síðustu skoðanakönnun eru það 37 prósent, hvorki meira né minna. Meira en þriðji hver Reykvíkingur. Það er semsagt talsvert til skiptanna.

Jón Gnarr hrærði aldeilis upp í hlutunum. Nú er spurning hvernig þeir setjast aftur.