Það er til ýmisleg skemmtun. Til dæmis að liggja yfir Google Street View og skoða heimili sitt, heimili foreldra, systkina, ættingja og vina.

Maður getur undrast tæknina sem er á bak við þetta.

Íslendingar duttu í Google Street View og hafa eytt síðustu dögum í að pósta myndum þaðan á Facebook.

Ég þekki reyndar eina konu sem finnst þetta „krípí“, að það sé verið að taka svona myndir nánast inn um gluggann hjá fólki.

Stundum er heldur ekki gott að birtast á mynd. Það er til dæmis ef maður er að koma út af hádegisbarnum án þess að maður vilji að neinn viti það, eða af Goldfinger – nú eða ef bifreið manns er stödd fyrir utan hús konunnar sem maður er ef til vill að halda framhjá með.

Eða ef maður hefur lagt í stæði fyrir fatlaða.

Það getur semsagt ýmislegt komið upp á.

Svo geta auðvitað verið skemmtilegar myndir eins og þessi þar sem má sjá ferðamenn ásamt innfæddum Akureyringum. Hún birtist á vefsíðu sem nefnist Iceland Street Adventures, en þar má finna fleiri skemmtilegar Google-myndir.

En eftirlitssamfélagið tekur á sig ýmsar myndir. Nú eru þeir líka farnir að kíkja í tunnurnar hjá manni til að sjá hvort manni hafi orðið á að henda Fréttablaðinu út með ruslinu.