Í Kiljunni í kvöld förum við út í Vestmannaeyjar með Eddu Andrésdóttur sjónvarpskonu. Edda hefur skrifað bók sem nefnist einfaldlega Út í Eyjar og hefur að geyma minningar hennar frá því hún var ung stúlka hjá ömmu sinni í Eyjum. Það var í Kirkjubæ, rétt hjá þar sem eldsprungan opnaðist í janúar 1973, staðurinn hvarf fljótt undir hraun.

Edda kom þá út í Eyjar sem ung blaðakona á Vísi og var þar löngum á tíma eldgossins.

Við fjöllum um endurútgáfu á grundvallarriti um Reykjavíkursögu. Þetta er bókin Undir bárujárnsboga eftir Eggert Þór Bernharðsson, en þar er sögð sagan af braggahverfunum sem voru víða um Reykjavík frá því í stríðinum og fram á sjöunda áratuginn. Það var löngum litið niður á fólkið sem bjó í bröggunum, það var jafnvel kallað braggalýður, en margt af því var einfaldlega venjulegt fólk sem var í húsnæðishallæri.

Við heyrum í ungum rithöfundi, Halldór Armand Ásgeirssyni, sem er að senda frá sér sína fyrstu bók, skáldverk sem nefnist  Vince Vaughn í skýjunum. Skáld- og leikkonan Halla Margrét Jóhannesdóttir flytur okkur ljóð.

Gagnrýnendur þáttarins fjalla um þrjár bækur, Glansmyndasafnarana eftir Jóanes Nielsen, einn helsta rithöfund Færeyja, ljóðasafn Nóbelsskáldsins Tomas Tranströmer og nýja ljóðabók Eiríks Arnar Norðdahl.

Bragi setur svo punkt eins og endranær.

Sum braggahverfin voru inni í miðjum bæ, svo var til dæmis um kampinn á Skólavörðuholti. Hann stóð þar sem kirkjan er nú. Á þessari loftmynd má líka greina Austurbæjarskólann, safn Einars Jónssonar og styttuna af Leifi Eiríkssyni.