Líklega eru þeir ekki margir sem muna eftir Vo Nguyen Giap sem nú er látinn í hárri elli.

En Giap var afar frægur á sínum tíma, mjög áhrifamikill –  sumir myndu jafnvel telja að hann sé einn mesti hershöfðingi allra tíma.

Giap stjórnaði her í tveimur styrjöldum sem voru mikið í heimsfréttunum – í frelsisstríði Vietnama gegn Frökkum og í Vietnamstríðinu þar sem börðust herir Norður-Vietnama og skæruliðahreyfingarinnar Viet Kong gegn her Suður-Vietnams og Bandaríkjamönnum.

Í báðum styrjöldunum hafði lið Giaps sigur.

Fullnaðarsigurinn yfir Frökkum var í umsátrinu fræga um Dien Bien Puh, þar króaðist franski herinn inni og varð loks að gefast upp.

Bandaríkjamenn gáfust upp á Vietnamstríðinu 1973 og tveimur árum síðar féll Saigon. Nokkuð er deilt um hvaða hlutverk Giap lék á seinni stigum þess stríðs, en það sem hann náði að sýna fram á var að her bændaþjóðar, sem gat falist í landinu, gat haft í fullu tré við heri stórvelda. Þannig tókst herjum hans að niðurlægja bæði Frakka og Bandaríkjamenn.

Frægt er hvernig Vietnamar grófu sig ofan í jörðina ef því var að skipta. Það gerðu þeir við Dien Bien Puh og aftur í hinu mikla kerfi jarðganga sem var notað í Vietnamstríðinu.

Giap var kommúnisti, menntaður í hagfræði, lögum og stjórnmálafræði á tíma frönsku nýlenduherranna, hann naut bestu menntunar sem þeir höfðu upp á að bjóða. Hann gekk í kommúnistaflokk Vietnams 1931 – hann tileinkaði sér hernaðarfræði með því að lesa mannkynssögu, en hélt mikið upp á kínverska spekinginn Sun Tzu og rit hans um hernaðarvísindi.

Giap var 102 ára þegar hann andaðist í gær. Helst er honum legið á hálsi fyrir að hafa fórnað hermönnum án tilliti til mannslífa og hræðilegra blóðfórna. Slíkar fórnir eru þó oft hlutskipti þeirra sem berjast gegn ofurefli vopna.