Dálkahöfundurinn frægi Andrew Sullivan skrifar um atburðina í Bandaríkjunum og segir að nú megi Obama alls ekki láta undan fyrir Repúblikanaflokknum.

Þeir sem ráði þar ríkjum séu engir íhaldsmenn heldur einfaldlega skemmdarvargar – vandalar.

Sullivan segir að þarna sé á ferðinni öfgafólk sem viðurkenni í raun ekki forsetann né bandaríska stjórnkerfið, það beiti í staðinn alls kyns kúgunartilburðum. Þeir hafi tapað síðustu tvennum forsetakosningum og dómsmáli fyrir Hæstarétti, en haldi samt áfram að þvælast fyrir heilbrigðisumbótum forsetans. Samt séu þær ekki róttækari en það sem forsetaframbjóðandi Repúblikana, Mitt Romney, stóð fyrir þegar hann var ríkisstjóri í Massachusetts.

Öfgarnar séu slíkar í Repúblikanaflokknum að hann sé tilbúinn að eyðileggja bæði bandaríska stjórnkerfið og valda stórskaða á efnahagskerfi heimsins, bara til að bregða fæti fyrir forsetann.

Sullivan segir að inn í þetta spili líka kynþáttahatur sem birtist í stöðugu tali um Obama sem landráðamann og svikara og ásökunum um að hann sé múslimi á fréttastöðinni Fox og í spjallþáttum í útvarpi.

Obama má ekki gefa eftir gagnvart þessari sturlun, segir Sullivan. Hann hafi hingað til spilað nákvæmlega eftir reglunum, meðan Repúblikanar hafi látið eins og slíkt sér bara fyrir bjána og aumingja, þeir velti taflborðinu um koll undir eins og staðan er þeim í óhag.