Japanski höfundurinn Haruki Murakami þykir líklegastur til að fá Nóbelsverðlaunin í bókmenntum í ár, samkvæmt veðmálafyrirtækinu Ladbrokes. Líkurnar eru hvorki meira né minna en þrír á móti einum.

Murakami er einn vinsælasti höfundur í heimi, verk hans hafa náð langt út fyrir hefðbundna bókmenntakreðsa. Síðustu bækur hans eru stórvirkið 1Q84.

Næst á eftir honum kemur bandaríski rithöfundurinn Joyce Carol Oates, síðan Ungverjinn Peter Nadas, Kóreumaðurinn Ko Un, svo Alice Munro frá Kanada og Adonis, skáld frá Sýrlandi.

Sjálfur hef ég talið að verðugasti Nóbelsverðlaunahafi af þeim sem ég hef lesið að ráði sé Ismail Kadare frá Albaníu, en hann er ekki ýkja ofarlega á listanum hjá Ladbrookes. Kadare er fæddur 1936.

Bob Dylan, sem oft hefur verið orðaður við Nóbelsverðlaun, er á svipuðu róli og Kadare. Líkurnar eru sagðar einn á móti fimmtíu að hann fái verðlaunin.

Murakami fetar á mjög frumlegan hátt milli raunsæis og fantasíu. Hann skrifar alvöru bókmenntir, skapar heim sem mjög sérstakur, en er á sama tíma einkar lagið að halda spennu í sögum sínum.