Ef marka má skoðanakönnun MMR virðist fylgi ríkissjórnarinnar vera falla stöðugt. Þegar stjórnin tók við var hún með næstum 60 prósenta fylgi hjá MMR, nú mælist það 49 prósent.

Nú eru liðnir meira en hundrað dagar frá því stjórnin tók við – það eru svonefndir hveitibrauðsdagar. Þeir hafa að mörgu leyti verið stjórninni erfiðir. Kannski má kenna reynsluleysi og ákefð sumra ráðherra um – en auðvitað bætir ekki úr skák að tóninn í stjórnarflokkunum er allt annar en var fyrir kosningar.

Óþolinmæði gagnvart ríkisstjórnum er mikil og ekki bara á Íslandi. Strax eftir að stjórnin tók við var farið að tala um að hún myndi ekki standa við loforð sín. Nú er búið að skipa vinnuhópa til að skoða skuldaafskriftir, verðtryggingu og gjaldeyrishöft. Alls staðar eru trúnaðarmenn Sigmundar Davíðs Gunnlaugssonar í forsvari. Það hlýtur að vera til marks um að honum sé mjög áfram um að standa við fyrirheitin.

Fylgi Framsóknarflokksins er náttúrlega mjög viðkvæmt. Sveiflan lá til flokksis mánuðina fyrir kosningar. Þetta fylgi getur yfirgefið hann í svipstundu – og hefur þegar gert það að hluta til samkvæmt skoðanakönnunum. En það er athyglisvert að fyrri stjórnarflokkar eru ekki mikið að bæta við sig, VG þó ögn. Flokkurinn mælist stærri en Samfylkingin. En samanlagt fylgi þeirra er ekki nema 27 prósent. Vinstri vængurinn er afar veikur um þessar mundir, og ríkisstjórnin getur huggað sig við að andstaðan gegn henni verður veikluð – að minnsta kosti framan af kjörtímabilinu.