Það er rætt um gjaldtöku á ferðamannastöðum. Virðist eiginlega óhjákvæmilegt, miðað við fjölgun ferðamanna og átroðninginn sem er á vinsælustu stöðunum. Við Mývatn, á Þingvöllum, Gullfoss og Geysi, í Landmannalaugum.

Forstöðumanni Rannsóknarmiðstöðvar ferðamála finnst þetta vond hugmynd. Hann vill nota styrkjasjóði til þessa.

En meðan við tökum ekki skattfé og setjum í þessi mál þá verður þetta svona áfram. Og það er líka spurning hvort þetta er ekki miklu sanngjarnara fyrirkomulag? Notandinn borgar.

Meðal þess sem hefur verið lagt til er að útbúa sérstakt Íslandskort sem ferðamenn geta keypt. Það ætti ekki að vera alltof dýrt. Eitt kort á bifreið myndi duga. Kortinu mætti svo framvísa á helstu ferðamannastöðunum ef fólk vill fara þangað. Hins vegar yrði dýrara að kaupa einstakan aðgang að vinsælustu stöðunum.

Staðir sem eru ekki síður fallegir en minna sóttir yrðu gjaldfrjálsir. Þannig væri jafnvel hægt að beina meiri umferð á til dæmis Vestfirði, þar eru fáir erlendir ferðamenn en ekki minni náttúrufegurð á ofantöldum stöðum.

Svona fyrirkomulag er alvanalegt vestanhafs. Ég ók í Klettafjöllin í Kanada í fyrra og þá þurftum við að borga fyrir að komast í þjóðgarðinn í Banff. Okkur þótti það ekki nema sjálfsagt.

Það er altént betra að taka vægt gjald og takmarka aðganginn aðeins en að þurfa að loka alveg vegna átroðnings eins og gerist í Dimmuborgum.