Þessi frábæra ljósmynd er tekin í árdaga Hljómskálagarðsins. Við sjáum að trjágróðurinn er býsna fátæklegur.

Þegar amma mín Herborg, sem var norsk, kom fyrst til Íslands 1927 sló það hana fyrst að hér voru hérumbil engin tré. Mamma segir að hún hafi stundum labbað upp á Grettisgötu til að skoða myndarlegt tré sem þar var, hún hefur kannski ekki faðmað tréð, en ég sé fyrir mér að hún hafi lagt höndina á stofn þess. Amma var mikil ræktunarkona.

Gróðurbyltingin í Reykjavík er afar merkileg. Menn trúðu því að hér væri ekki hægt að rækta tré, en það reyndist vera meinloka – eins og margt annað í hugarfari Íslendinga.

Trén hafa bætt veðrið í Reykjavík, loftið sem við öndum að okkur, lífsgæðin.

Við sjáum á myndinni að styttan af Thorvaldsen er komin í Hljómskálagarðinn, hún var flutt þangað af Austurvelli. Hljómskálinn hefur verið reistur, hann var byggður 1923.

Myndin er af vefnum 101Reykjavik.