Hanna Birna Kristjánsdóttir segir að fylgi Sjálfstæðisflokksins hafi minnkað vegna „mistaka“ í Icesavemálinu.

Það er reyndar spurning hvort það eigi að kalla þetta mistök, forysta Sjálfstæðisflokksins mælti með samþykkt síðasta Icesavesamningsins, þess sem var kenndur við Lee Buchheit. Sú afstaða var tekin eftir talsverða íhugun – það er ljóst að sá samningur hefði ekki valdið þjóðarbúinu teljandi búsifjum, og auðvitað hefði dómur EFTA-dómstólsins getað fallið á annan veg.

Manni sýnist að eftir að dómurinn var kveðinn upp leiti fylgi frá Sjálfstæðisflokknum til Framsóknar. Framsókn sveiflast upp í 20 prósent og Sjálfstæðisflokkurinn fer niður undir 30 prósent.

Þetta sýnir að Sjálfstæðisflokkurinn á síður en svo einhvern stórsigur vísan í kosningunum í vor – og líklega er það rétt sem sagt er að Hann Birna væri líklegri til að leiða flokkinn til sigurs en Bjarni Benediktsson.

Framsókn er líklega að græða líka á loforðum um að afnema verðtryggingu og bæta hag skuldara. Þetta er þó net sem er auðvelt að flækja sig í. Það er ekki líklegt að Framsókn nái miklu fram í þessu efni í stjórnarmyndunarviðræðum við til dæmis Sjálfstæðisflokkinn.

Og svo er eins og Framsóknarmenn viti að þetta geti orðið býsna þungur róður: Þeir leggja til að verðtryggingin verði sett í nefnd og ekki var annað að heyra á Sigmundi Davíð í fréttum í morgun að tími flatra afskrifta sé liðinn, aðgerðirnar yrðu semsagt sértækar en ekki almennar og þá varla 20 prósenta niðurfelling eins og hefur oft verið nefnt á vettvangi Framsóknar.