Björn Jón Bragason, sem hefur umsjón með síðunni 101Reykjavík, sendi mér upplýsingarnar sem þessi pistill er byggður á eftir að ég birti greinarkorn þar sem minnst var á Trípolíbíó.

Bíóið opnaði 1947 í bragga sem hafði verið notaður undir leik- og kvikmyndasýningar á stríðsárunum. Það var Tónlistarfélagið í Reykjavík sem sá um bíóreksturinn og fékk ágóðann, það er sagt að bíóið hafi malað gull fyrir félagið, en á þessum árum var rekstur kvikmyndahúsa háður ströngum leyfum. Félagið gerði samkomulag við stjórnvöld sem tryggðu að það fékk líka skemmtanaskattinn af kvikmyndasýningum.

Síðar réðist félagið í að byggja Tónabíó í Skipholti, en það opnaði 1962. Það var sérlega fallegt kvikmyndahús, þægilegur en ekki of stór salur sem samsvaraði sér vel. Þarna sá maður fjölda góðra mynda, spaghettivestra, Bond, Woody Allen og kvikmyndir Bítlanna. Á efri hæðum hússins starfaði Tónlistarskólinn í Reykjavík og gerir enn.

Á þessum árum var það útbreidd hugmynd að bíósýningar skyldu standa undir verðugri starfsemi. Háskólabíó átti að leggja fé til Háskólans, Laugarásbíó var rekið af Sjómannadagsráði í tengslum við Hrafnistu, Tónabíó lagði sitt af mörkum til tónlistarinnar, en einnig stóð til að á Skólavörðuholti risi Iðnskólabíó, mun hafa verið komið vilyrði fyrir byggingu þess.

Hér er mynd af Iðnskólanum og Iðnskólabíóinu eins og það átti að líta út. Það var Þór Sandholt, skólastjóri Iðnskólans, sem gerði myndina.