Ætli Sigmund Davíð Gunnlaugsson og Bjarna Benediktsson hafi grunað þegar þeir tóku við völdum í maí 2013 að einu og hálfu ári síðar sætu þeir í einhverri óvinsælustu ríkisstjórn Íslandssögunnar?

Því þeir voru að taka við af annarri ríkisstjórn sem hafði nánast sett Íslandsmet í óvinsældum, var í rauninni fallin fyrir kosningar, lafði áfram hálfpartinn sem minnihlutastjórn og var algjörlega þrotin að kröftum.

En nú er fylgi ríkisstjórnar Sigmundar og Bjarna komið á svipaðar slóðir og fylgið við ríkisstjórn Jóhönnu Sigurðardóttur var um það bil að hún var kosin frá völdum.

33 prósent mælist stuðningurinn við stjórnina í nýjum þjóðarpúlsi Gallups. Fer niður um fimm prósentustig frá síðustu könnun.

Það var því mjög skiljanlegt að Bjarni Benediktsson reyndi að slökkva elda á flokkstjórnarfundi Sjálfstæðisflokksins í morgun með því að segja að bygging nýs spítala hefjist á kjörtímabilinu. Líklega er ekkert að fara verr með stjórnina en umræðan um heilbrigðismálin – þau eru satt að segja farin að valda verulegri vanlíðan meðal þjóðarinnar.

Aftur virðast flutningar fólks til Noregs vera að magnast upp, það eru víða verkfallsátök, og almennt skynjar maður ekki að miklar vonir séu bundnar við skuldaleiðréttinguna sem á að koma fram á næstunni – seint og um síðir.

Nú er boðað til mótmæla á Austurvelli á mánudaginn undir yfirskriftinni Hysið upp um ykkur buxurnar ríkisstjórn. Allt í einu er hinn ljúfi túbadúr Svavar Knútur orðinn mótmælaforingi. Aðgerðunum virðist í raun jafnmikið beint gegn stjórnunarstílnum og stefnunni.