DV skýrir frá því í morgun að hafin sé stórfelld vopnavæðing lögreglunnar. Að framvegis verði allir lögreglubílar búnir skammbyssum og hríðskotabyssum. Í fréttinni segir að keyptar hafi verið 200 hríðskotabyssur.

Þetta eru tíðindi – og líka það að þarna hafi ríkt leynd.

Ísland er jú eitt friðsælasta land í heimi og státar sig af því að vopnaburður er mjög fátíður.

Um stefnubreytingu af þessu tagi þarf að vera umræða í samfélaginu, sé þörf á þessum vopnum eiga yfirvöld lögreglumála að skýra það út fyrir almenningi. Þetta hlýtur að byggja á einhverju mati.

Hvað er það sem útheimtir þessi vopn? Þurfa lögreglumenn að beita þeim eða er nægilegt að hótunin sé til staðar? En þarf þá ekki að segja frá tilvist vopnanna?

Hver er hættan, hefur vopnaeign farið vaxandi í undirheimum eða óttast menn hryðjuverkaárásir?

Hefðu vægari úrræði dugað, eins og til dæmis rafbyssur?

Og hví þessi leynd?