Í raun er það alveg óskiljanlegt að Alþingi þurfi að fara í frí vegna þess að sveitarstjórnarkosningar eru að koma.

Núorðið fær maður varla sé að Alþingi og kosningar til bæjar- og sveitarstjórna skarist á nokkurn skapaðan hlut.

Alþingi er ekki svo fyrirferðarmikið í fréttum að sveitarstjórnarkosningar komist ekki að, Einar Kr. Guðfinnsson þingforseti sagði að þingmenn væru að rýma vettvang fyrir sveitarstjórnamönnum.

En það er örugglega pláss fyrir báða hópana.

Er gert ráð fyrir að þingmenn fari heim í hérað og hjálpi til í kosningabaráttu? Í sumum tilvikum getur það jafnvel orkað tvímælis. Óvinsæll þingmaður gæti jafnvel mætt heim í hérað og skemmt fyrir.

Það er reyndar ljóst að stjórnarflokkarnir – og þá aðallega Framsókn – ætla að reyna að hífa upp fylgið með skuldaleiðréttingunni sem var samþykkt í lok þings.

Auðvitað er óvíst hvernig það virkar – þetta er býsna umdeilt mál –  en sjónvarpsauglýsingar þar sem skuldaleiðréttingin verður auglýst munu vera á leiðinni í loftið.

Og eins og sést á þessari mynd sem birtist á Facebook-síðu Sigmundar Davíðs Gunnlaugssonar er mikil stemming í þingflokki Framsóknarmanna. Með myndinni fylgdi svohljóðandi texti:

Þingflokkurinn kátur eftir fimm ára bið. Loksins!