Frambjóðendur og flokksmenn verða oft mjög skrítnir í aðdraganda kosningar. Þá fara þeir að gera hluti sem þeir myndu annars ekki gera – og sem flestum þykja hallærislegir, nema kannski þeim sjálfum – í hita baráttunar sem hefur ruglað dómgreind þeirra.

Þannig er til dæmis um frambjóðendur Bjartrar framtíðar sem fóru að afgreiða ís í ísbúð vestur í bæ í kvöld. Það er erfitt að skilja tilganginn með þessu tiltæki – myndi það ekki fyrst og fremst fara í taugarnar á manni ef frambjóðendur þvælast fyrir manni í ísbíltúrnum?

Svo er það Framsóknarmaðurinn sem þolir ekki að „frammámaður“ í Ferðafélagi Íslands skrifi illa um Framsóknarflokkinn og kvartar undan honum með eftirfarandi orðum.

Enn og aftur hefur frammámaður FÍ, Páll Ásgeir, stórskaðað orðspor okkar góða félags með sínu sjálfhverfa, rætna og sóðalega gaspri á netmiðlum. DV er hans uppáhaldvettvangur þar sem hann fyrir hittir jafningja sína. Í dag mátti sjá enn eina drulluslummuna undir beinni línu hjá oddvita framsóknar í borginni.

Gerð er sú krafa að höfð sé í heiðri sú óskrifaða regla að frammámenn félagsins ofbjóði ekki öðrum félagsmönnum og almenningi með hatursfullu háttalagi sínu.

Á sama tíma er það orðið að fréttamáli að Sveinbjörg, sem situr í fyrsta sæti á lista Framsóknar í Reykjavík, segir Láru Hönnu upp sem Fésbókarvini af því hún hafi beitt sig einelti.

Reyndar hefur maður svolítla samúð með Sveinbjörgu – til hvers var Lára Hanna að vingast við hana á Facebook ef hún ætlaði bara að vera með leiðindi?

Sjálfstæðismenn festa upp myndir af oddvitanum í Reykjavík á skilti í Kópavogi og á Seltjarnarnesi – jú, það má prófa allt.