Davíð Oddsson, sem hefur ekki þekktur fyrir að vera sérstakur stílisti,  skammar Pírata fyrir „druslugang“ í Reykjavíkurbréfi á laugardag. Honum þykja þeir ekki nógu vel klæddir. Hann setur út á „gallabuxur og bindisleysi“ og segir:

Hver ætti að hafa meiningar um það hvort fólk, sem það hefur aldrei heyrt minnst á og veit ekki við hvað fæst í vinnunni, klæðir sig í larfa til að bjarga þjóðarhag eða tekur áhættuna af því að vera sæmilega til fara.

Stílistarnir eru líka komnir á stúfana í Bretlandi og beinast áhyggjur þeirra að Jeremy Corbyn. Breskir stjórnmálamenn eru yfirleitt nokkurn veginn eins til fara. Karlarnir í jakkafötum með annað hvort blá eða rauð bindi, konurnar í drakt. Kannski er þetta beint framhald af skólabúningunum sem bresk börn eru neydd til að íklæðast.

The Independent skrifar um þetta og spyr hvort Corbyn neyðist til að flikka upp á klæðaburð sinn. Birt er mynd af honum þar sem hann er í stuttbuxum, svörtum skóm og svörtum sokkum. Haft er eftir einum þingmanni Verkamannaflokksins að Corbyn sé of „ósnyrtilegur“ fyrir smekk flestra kjósenda. Um Corbyn hefur reyndar verið sagt að hann kaupi fötin sín í kaupfélaginu í Dalston, það er í norðaustur London – The Dalston Co-Op.

Jú, og Corbyn á húfu eins og Jón Bjarnason.

The Independent spyr tískuráðgjafa ráða um þetta brýna mál og hún ráðleggur Corbyn að breyta sér ekki of skart. Hann megi ekki fæla burt kjósendur sínar – sem myndu væntanlega ekki þekkja hann fyrir sama mann. Hann eigi semsagt ekki að leggja leið sína til klæðskeranna á Savile Row, en kannski fara fremur í Marks & Spencer en kaupfélagið. Hann þurfi bara aðeins að hressa upp á klæðavalið, forðast drapplituð föt og setja upp bindi. Hann hafi reyndar sýnt viðleitni í þessa átt þegar hann birtist í þinginu í gær.

En hvernig verður þetta þegar Píratarnir komast í ríkisstjórn – verður þá áfram bindisleysi og gallabuxur og tómur druslugangur?