Það gæti verið sterkur leikur hjá Bjartri framtíð að kjósa Óttarr Proppé sem formann. Hann er reyndar sjálfkjörinn á flokksþingi sem haldið er á Suðurnesjum – enginn annar lýsti raunverulegum áhuga á að taka að sér starfið.

Eins og staðan er í skoðanakönnunum er varla nema tvennt í stöðunni, annað hvort tekst Bjartri framtíð að sækja fram og auka fylgið eða liggur beinast við að leggja flokkinn niður. Ein hættan fyrir Bjarta framtíð er reyndar sú að kjósendur sjái varla annað um þessar mundir en Píratana með sitt 36 prósenta fylgi í skoðanakönnunum.

Óttarr hefur átt feikilega góðar innkomur á Alþingi, haldið ræður sem hafa vakið þjóðarathygli, borið af í umræðum sem er sjónvarpað – og hann hljómar öðruvísi en flestir stjórnmálamenn. Enda er hann runninn upp úr öðrum jarðvegi – var einn úr nánasta hópi Jóns Gnarr í Besta flokknum, á engan feril innan hins óvinsæla fjórflokks.

Þessi ræða Óttarrs vakti mikla athygli fyrir tveimur árum – og á ennþá við:

Óttarr er hæglátur maður, fyrrverandi bóksali. Hann er ekki líklegur til að æsa sig í umræðum flokksformanna eða standa í andlausu karpi. Það gæti hjálpað. Hann virkar talsvert dýpri en forveri hans Guðmundur Steingrímsson. En Óttarr á líka sínar villtu hliðar, hafandi verið söngvari í rokkhljómsveitum um langt árabil.

Hér er til dæmis lag með hljómsveitinni Rass sem Óttarr söng með: