Repúblikanarnir sem stjórna nú báðum deildum Bandaríkjaþings eru stórhættulegt lið. Það er hræðileg staðreynd að meirihluti þeirra sem tóku þátt í síðustu þingkosningum kaus óvini sína.

Obama forseti hélt afar tímabæra stefnuræðu þar sem hann sagði að nauðsyn væri að hækka skatta á ríkt fólk, jafnari tekjuskiptingu,hann talaði um afnám viðskiptabannsins á Kúbu og samninga við Íransstjórn um að nota kjarnorku á friðsamlegan hátt.

Allt er þetta eitur í beinum Repúblikananna og þeir eru til í að gera hvað sem er til að grafa undan forsetanum. Nú hefur John Boehner, leiðtogi Repúblikana í þinginu, boðið Benjamin Netanyahu, forsætisráðherra Ísraels, að ávarpa báðar þingdeildirnar.

Netanyahu mun þar tala gegn stefnu forsetans í málefnum Írans, leiðtogi erlends ríkis mætir upp úr þurru – forsetinn var ekki látinn vita – til að grafa undan forystu Obamas í alþjóðamálum. Það er forsetinn sem fer með alþjóðamálin – annars er hætta á að ríkið hafi tvenns konars stefnu í utanríkismálum. Þannig taka Repúblikanar afstöðu með erlendu ríki gegn forsetanum – og ganga svo langt að klappa fyrir brýningarorðum hans í sjálfu þinghúsinu.

Boehner og Netanyahu – í Ísrael er stundum sagt í gríni að Netanyahu upplifi sig fremur sem þingmann Repúblikana frá Ísrael en leiðtoga ríkis.