Donald Trump segist vilja auka útgjöld til hermála um 54 milljarða dollara. Á fundi með ríkisstjórum sagði Trump að hann muni ekki auka skuldir ríkisins vegna þessa. Fjármagnið muni fást með því að skera niður í þróunaraðstoð og öðrum útgjöldum alríkisins, þar á meðal eru umhverfismál nefnd til sögunnar.

Nú er unnið að fjárlagagerð en fjárlögin verða birt í næsta mánuði. Trump sagði að áætlun hans væri „áætlun um öryggi almennings“ og væri byggt á kosningaloforðum hans. Hann sagði að fjárlögin myndu senda þau skilaboð til umheimsins að Bandaríkin væru sterk, hugsuðu um öryggismál og væru staðföst.

„Við verðum að byrja að vinna stríð á nýjan leik.“

Sagði Trump. Hann sagðist vera staðráðinn í að láta hernum í té þau verkfæri sem hann þarfnaðist og sagði að hluti af fjárveitingunni verði notaður til að byggja skip og flugvélar fyrir herinn.

Sky-fréttastofan segir að ekkert ríki heims eyði meiru í her sinn en Bandaríkin og það sé mjög óvenjulegt að útgjöld til hersins séu aukin þegar landið er ekki í neinu stóru stríði. Sérsveitir landhersins og flugherinn taka þó þátt í baráttunni gegn hryðjuverkasamtökunum, sem kenna sig við Íslamska ríkið, í Írak og Sýrlandi.

Trump sagðist einnig vilja auka fjárveitingar til lögreglunnar og landamæraeftirlitsins til að halda hryðjuverkamönnum og ofbeldisfullum afbrotamönnum frá Bandaríkjunum.

Trump hefur þó ekki lokaorðið um fjárlögin því þingið verður að samþykkja þau. Repúblikanar eru í meirihluta á þingi en það er þó engin trygging fyrir að fjárlagafrumvarp Trump fari óbreytt í gegnum þingið. Samningaviðræður um endanlega útgáfu þess gætu tekið marga mánuði.