Sigurjón Þ. Árnason fyrrverandi bankastjóri Landsbankans vill að tvö dómsmál gegn honum verði tekin upp að nýju. Sigurjón var í október 2015 dæmdur í þriggja og hálfs árs fangelsi í Hæstarétti fyrir umboðssvik og markaðsmisnotkun í Ímon-málinu svokallaða. Sigurjón var svo aftur dæmdur í fangelsi í febrúar 2016, þá í 18 mánuði, fyrir umboðssvik og markaðsmisnotkun.

Sigurður G. Guðjónsson lögmaður Sigurjóns sagði í samtali við Fréttablaðið að beiðni um endurupptöku byggi fyrst og fremst á fréttum af hlutabréfaeign dómara:

Svo hefur verið að koma í ljós að þeir hafa verið að staðfesta að þeir hafi tapað fjármunum í bankahruninu, sumir dómarar,

sagði Sigurður.

Jón Steinar segir dómstóla hafa brotið á mönnum

Jón Steinar Gunnlaugsson lögmaður og fyrrverandi dómari við Hæstarétt Íslands hefur sagt engan vafa leika á því að dómstólar á Íslandi hafi alvarlega brotið á rétti sakborninga, þá sérstaklega í málum þar sem einstaklingar voru dæmdir fyrir umboðssvik. Segir Jón Steinar að meðal þeirra skilyrða sem þarf að uppfylla er að sanna að slík brot hafi verið framin með það að markmiði að sakborningurinn hafi augðast á þeim persónulega á kostnað stofnunarinnar sem hann fór í umboði fyrir:

Hér hefur fjöldi manna verið sakfelldur fyrir slíkt, þó að öllum hafi mátt vera ljóst að tilgangur þeirra var ekki að auðga sjálfa sig eða aðra á kostnað bankanna, heldur miklu fremur var um að ræða tilraunir til að bjarga þessum stofnunum frá þeim fjárhagslega skaða sem ekki reyndist umflúinn.