Þorsteinn Víglundsson félags- og húsnæðismálaráðherra segir 95% fasteignalán merki um ofhitnun og bólumyndun á fasteignamarkaði. Hugnast honum illa svo há lán, en í gær var greint frá því að byggingarfélagið Þak hygðist bjóða kaupendum íbúða á Kársnesinu í Kópavogi 15% seljendalán til móts við 80% bankalán. Sagði Þorsteinn í Morgunútvarpi Rásar 2 í morgun að við ættum að óttast bólueinkenni á fasteignamarkaði, framan af hafi fasteignaverð þróast í takt við kaupmáttaraukningu en nú er hægt að sjá skýr merki þess að hækkunin er umfram kaupmáttaraukningu með tilheyrandi þrýstingi.

Sverrir Einar Einarsson forsvarsmaður Þaks sagðist í fréttum í gær ekki hafa áhyggjur af því að fólk gæti ekki borgað af íbúðunum þar sem afborganirnar væru talsvert lægri en meðal leiguverð á höfuðborgarsvæðinu og í versta falli myndi félagið leysa íbúðirnar til sín aftur. Kom þar einnig fram að fleiri byggingarfélög væru að undirbúa svipuð lán. Þorsteinn segir að honum hafi litist enn verr á tilhögunina við lánveitingarnar, en 15% seljendalánið yrði með rúmlega 10% vöxtum til skamms tíma:

Þannig að þetta þýðir að þetta er mikil greiðslubyrði fyrir fólk,

sagði Þorsteinn. Segir hann að best sé að leysa vandann á húsnæðismarkaðnum í dag með því að tryggja framboð á lóðum og með því að auka framboð á smærri íbúðum.