Útvarp Saga segir að Þórhildur Sunna Ævarsdóttir þingmaður Pírata hafi ráðist á sig úr ræðustól Alþingis í gær, en Þórhildur sagði gagnrýni talsmanna Útvarps Sögu á Evrópunefnd gegn kynþáttafordómum og umburðarleysi, ECRI, vera ómaklega. Í byrjun mánaðarins kom út skýrsla nefndarinnar í kjölfar reglubundinnar eftirlitsferðar hingað til lands, þar var greint frá áhyggjum af því að Útvarp Saga væri að breiða út hatursboðskap hér á landi, sérstaklega hvað varðaði hinsegin fólk, innflytjendur og múslima. Hefur skýrslan verið harðlega gagnrýnd af stöðinni og krafði Arnþrúður Karlsdóttir útvarpsstjóri Útvarps Sögu Velferðarráðuneytið um nöfn þeirra nefndarmanna sem hingað komu auk þess hvaða menntun og sérfræðiþekkingu viðkomandi einstaklingar hafi.

Þórhildur vitnaði í ræðu sinni á Alþingi í samtal sitt við Christian Åhlund, formann nefndarinnar, þar sem hann var sammála henni að málfrelsi væri vissulega mikilvægur réttur en að útvarpsstöðvar nytu ekki mannréttinda:

Málfrelsi er mikilvægt og raunar óaðskiljanlegur hluti af lýðræðislegu samfélagi, en orðum fylgir ábyrgð og orðum fylgja afleiðingar. Við berum því ábyrgð á þeim orðum sem við notum til þess að lýsa fólki,

sagði Þórhildur. Segir hún enga tilviljun að Ísland, sem og Evrópa, líti þögul undan á meðan þúsundir manna drukkna við strendur álfunnar því orðin séu notuð til að réttlæta það:

Við köllum þau hælisleitendur, við tölum um fólksflutninga, við köllum þau ólöglega innflytjendur, þótt aldrei dytti nokkrum manni í hug að kalla Evrópubúa sem flytja á milli landa nöfnum af þessum toga. Við réttlætum meðferðina á þeim, brottvísun í skjóli nætur, algjört skeytingarleysi okkar gagnvart afdrifum þeirra að brottvísun lokinni, með því að kalla umsóknir þeirra um vernd tilhæfulausar, með því að kalla þau hælisleitendur, með því að kalla þau flóttamannatúrista. En þær bera allar nöfn, þær manneskjur sem við komum svona fram við, þær heita Amír og Eze og Abdul Hamid, svo að tæmi séu tekin.

Í dag birtist svo frétt á vef Útvarps Sögu um ræðu Þórhildar Sunnu undir yfirskriftinni „Réðist að Útvarpi Sögu í ræðustól Alþingis og vitnaði í tveggja manna tal“. Þar segir:

Geta má þess eins og flestum má vera ljóst að Útvarp Saga gagnrýndi að stjórnendur sem eðli málsins samkvæmt eru jafnframt talsmenn stöðvarinnar hefðu ekki fengið andmælarétt áður en efni skýrslunnar kom út en ekki að útvarpsstöðin sjálf sem fyrirtæki hefði ekki fengið andmælarétt. Þá má einnig geta þess að Þórhildur Sunna Ævarsdóttir verður gestur í síðdegisútvarpinu á morgun, fimmtudag.