Ákvörðun forseta Alþingis, Þórunnar Sveinbjarnardóttur, um að beita 71. gr. þingskaparlaga á 2. umræðu um veiðigjaldafrumvarpið á Alþingi í morgun hefur vakið mikla athygli.

Sitt sýnist hverjum um ákvörðunina en Illugi Jökulsson er einn þeirra sem upplifir hreinlega létti við ákvörðunina umdeilda. Ástæðan er sú að meirihlutinn hefur nú sýnt Sjálfstæðismönnum, sem setið hafa í valdastól samfélagsins lengst allra, að nú séu aðrir sem ráði för.

„Ykkur finnst þetta kannski skrýtið en ef þið hefðuð eins og ég búið í áratugi í samfélagi þar sem alltaf hefur legið milli línanna að hvernig sem allt veltist, þá ráði Sjálfstæðisflokkurinn alltaf í frímínútunum af því hann er frekastur og pabbi hans ríkastur, þá munduði skilja hvað það er skringilega mikill léttir að því að allt í einu séu kannski komnir nýir krakkar í bekkinn sem segi bara hingað og ekki lengra,“ skrifar Illugi.