Samtök gyðinga í Danmörku hafa miklar áhyggjur af orðum múslimsk predikara sem hann lét að sögn falla við föstudagsbænir í moskunni á Heimdalsgade á Norðurbrú í Kaupmannahöfn. Þar sagði hann að sögn meðal annars að „dómsdagur renni ekki upp fyrr en múslimar berjist við gyðinga og drepi þá“.

Kristeligt Dagblad skýrir frá þessu. Þar kemur fram að bandarísk stofnun, Memri, hafi þýtt það sem predikarinn sagði í ræðu sinni og þar virðist sem hann hvetji til morða á gyðingum. Samtökin ætla nú að setja sig í samband við lögregluna til að kanna hvort grundvöllur sé fyrir að kæra predikarann.

Danska ríkisútvarpið hefur eftir Dan Rosenberg Asmussen, formanni samtaka danskra gyðinga, að hann telji að predikarinn hafi gerst brotlegur við lög um níð gagnvart ákveðnum þjóðfélagshópum á grundvelli trúar þeirra, litarháttar eða annars. Hann sagði einnig að hugsanlega væri um brot að ræða á nýlegum lögum um haturspredikara.

Samkvæmt nýju lögunum á að taka hart á þeim sem flytja hatursáróður í bland við trúarlegar predikanir og á grundvelli laganna hafa dönsk stjórnvöld bannað nokkrum þekktum haturspredikurum, bæði múslimskum og kristnum, að koma til Danmerkur.

Í predikun sinni er umræddur predikari meðal annars sagður hafa sagt að „dómsdagur renni ekki upp fyrr en múslimar berjist við gyðinga og drepi þá“. Þessi orð lét hann að sögn falla í predikun 31. mars síðastliðinn en bænastundin og predikunin hafa verið birt á YouTube. Danska ríkisútvarpið vinnur nú að því að láta þýða predikunina.

Samtök danskra gyðinga telja þýðingu bandarísku stofnunarinnar vera trúverðuga en slík hatursræða hefur að sögn Asmussen áður átt sér stað í predikunum í Danmörku.

Talsmenn umræddrar mosku svöruðu ekki beiðnum blaðamanna Kristeligt Dagblad um skýringar á ummælum predikarans.