Eftir Björn Bjarnason:
Frá því var sagt hér á landi i vor að nýtt æði hefði gripið íslensk börn og ungmenni, leikfang sem kallast á ensku fidget spinner. Margar tillögur hefðu komið fram um íslenskt heiti yfir þessi leikfang, til að mynda spinnegal, eirðarkringla, þeytispjald, þyrilsnælda, snældusnúður, fiktisnælda, snælduspóla, spunavél, askibani eða aðins þeytingur sem hér verður notað.
Þeytingur nýtur vinsælda um heim allan, meðal barna vekur hann alls staðar mikinn áhuga, svo mikinn að í Rússlandi varð yfirvöldunum nóg boðið og í rússneska ríkissjónvarpinu var gefið til kynna að ætlunin væri með þeytingi að vinna gegn Kremlverjum.
Í fréttum í rússnesku ríkissjónvarpsstöðinni TV Rossija-24 var áhorfendum sagt að þeyting hefði „nokkrum sinnum mátt sjá í höndum félaga í stjórnarandstöðunni“. Var gefið til kynna að leikfangið væri nátengt pólitískum undirróðri bæði innan Rússlands og utan.
Neytendastofa Rússlands, Rospotrebnadzor, vísaði til sjónvarpsfréttarinnar og gaf fyrirmæli um að rannsakað yrði hvort þeytingur hefði neikvæð áhrif á heilsu og líðan barna.
Greiningardeild ESB á rússneskum áróðurs- og lygafréttum segir að þetta sé ekki fyrsti leikurinn fyrir börn sem rekja megi til vondra, vestrænna njósnara.
Stuðningsmenn stjórnarandstæðingsins Alexeijs Navalníjs voru nýlega sakaðir um að vera í sambandi við sjálfsmorðshópa á netinu sem beindu spjótum sínum að rússneskum unglingum og rússneskir ríkismiðlar hafa kallað Navalníj sjálfan „pólitískan barnaníðing“ vegna þess hve vel honum hefur gengið að virkja unga Rússa til þátttöku í mótmælaaðgerðum. Nú hefur greinilega verið gefin sú „lína“ frá Kreml að í ráðandi rússneskum fjölmiðlum sé andstöðu við stjórnvöld lýst sem líkamlega hættulegri fyrir unga Rússa.
Ekki er langt um liðið síðan sagt var frá því í rússnesku sjónvarpi að Pokemon Go-leikurinn væri í raun runninn undan rifjum erlendra njósnastofnana og væri liður í njósnastarfsemi þeirra um heim allan.
