Tískumeðvitaðir hafa beðið með öndina í hálsinum eftir spádómum tískuyfirvaldsins um hvaða hárgreiðslur verða ríkjandi á árinu sem var að ganga í garð.
Bazaar er einn vefjanna sem mark er tekið á og hér kemur þeirra spádómur:
Súperslétt
Tími sléttujárnsins er aldeilis ekki liðinn. Skipt í miðju, rennislétt og glansandi á víst að verða meiriháttar heitt útlit árið 2017. Mundu bara að nota hitavörn fyrir hárið því þetta er bara smart ef hárið er heilbrigt.
Hátt tagl
Tagl efst á hvirflinum í hvaða formi sem er. Lauslega greitt eða slétt og straujað. Flott greiðsla sem hækkar þig í þykjustunni og ef þú strekkir hárið mjög fast virkar hún eins og tímabundin andlitslyfting!
Flatir liðir
Kendall Jenner er að sjálfsögðu með þetta trend á hreinu. Hér er sléttujárn notað til að búa til flata og hófstillta liði í hárið.
Úr sér vaxnar styttur
Síðar klippingar með styttum og toppi voru agalega vinsælar árið 2016 og nú vill svo skemmtilega til að einmitt þær klippingar, úr sér vaxnar, eru sjóðheitar. Þegar toppurinn er nægilega síður er tilvalið að skipta í miðju.
Cher hár
Óralangar hárlengingar eiga einhvern líftíma eftir. Að undanförnu hafa ekki minni spákonur en Kardashian systur sést skarta þeim og Bazaar spáir þeim góðu lífi að minnsta kosti í janúarmánuði.
Allt til hliðar
Kannski er þessi tískuhárgreiðsla sú einfaldasta af þeim öllum. Þú einfaldlega skellir öllu hárinu til annarrar hliðarinnar og býrð þannig til passlega kæruleysislega og ofursmart hárgreiðslu.
Afslappað og glansandi
Ýmsar ofurskvísur hafa skartað þessari greiðslu – og hún var vinsæl á tískupöllunum þegar vor og sumarlínur tískuhúsanna fyrir 2017 voru kynntar. Hárið lítur út eins og þú sért nýstigin út úr sturtu. Mjög einfalt. Best er að nota gel eða aðra hárvöru sem hefur dálítið hald og gefur þetta rennblauta lúkk.
Gullinbrúnt
Að lokum er því spáð að gullinbrúni liturinn verði ríkjandi á árinu. Hlýlegur og breytist eftir því hvernig ljósið fellur á hann. Liturinn hæfir flestum húðtónum og Bazaar stingur upp á því að þeir sem hafa alltaf látið sig dreyma um ljósa lokka gætu einmitt prófað núna.
