Listakonan Jónborg Sigurðardóttir, sem oftast er kölluð Jonna, notar listaverk sín óspart í þeim tilgangi að skapa umræðu. Jonna starfar á Akureyri og hafa verk hennar oft vakið mikla athygli. Þar á meðal eru verk úr túrtöppum og kjötpíkur sem hún saumaði úr svínakjöti. Tilgangur verksins var meðal annars að skapa umræðu um fegrunaraðgerðir á píkum.

„Það fengu margir áfall þegar ég setti mynd af kjötpíku á Facebook,“ segir Jonna sem ræddi um listina og margt fleira í viðtali við Akureyri vikublað.

„Í mars voru þrjú ár síðan ég fékk þrjár hjúkkuvinkonur mínar til að hjálpa mér að sauma kjötpíkur. Við saumuðum fjórar píkur úr svínakjöti í eldhúsinu mínu og skemmtum okkur vel við saumaskapinn, píkurnar eru ennþá til. Þær eru í plaststöplum úti í garði. Fyrst fengu þær að rotna í sex vikur inni á sýningu en svo færði ég þær út og nú fer að líða að því að ég fjarlægi þær. Fyrst þarf ég að mynda og skrá niður breytingarnar á rotnun á þremur árum. Mér finnst svo gaman að gera svona tilraunir. Sumum finnst þetta kannski ógeðslegt en það er svo margt í samfélagi okkar sem er ógeðslegt.“

Jonna hefur einnig unnið mikið með plast í verkum sem gagnrýna neysluhyggju og umgengni.

„Það er svo mikið af plasti alls staðar. Maður kaupir skyrdós úr plasti, með álloki, plastloki og plastskeið. Þetta er fáránlegt,“ segir Jonna. Hún vinnur nú meðal annars að hönnun heimilispoka úr dagblöðum sem hún vonast til að geti tekið við af plastinu.

„Ég er langt frá því að vera fullkomin í þessum efnum og tek þátt í neysluhyggjunni eins og allir aðrir, kaupi góðan mat, á bíl og elska að ferðast,“ segir hún.

„Ég flokka, endurnýti, endurvinn og frysti afganga og þótt ég klippi oft í sundur tannkremstúpur og skoli er ég ekki alltaf í stuði til að þvo plastið utan af kjúklingi. Maður á sína letidaga og er ekkert heilagur. Málið er hins vegar að margt smátt gerir eitt stórt.“