Helgi Sigurðsson, þjálfari Fylkis, var virkilega ánægður með sína menn í dag eftir 3-1 sigur á Þór í fyrstu umferð Inkasso-deildarinnar.

,,Það sást frá fyrstu mínútu að það var eitt lið á vellinum sem vildi vinna þennan leik og væri til í að hafa fyrir því og hafa gaman og það var Fylkir,“ sagði Helgi.

,,Maður veit aldrei hvernig þetta fer af stað, fyrsti grasleikur og mikil spenna, menn sofa misjafnlega vel fyrir svona leiki.“

,,Maður þarf að hugsa mest um sitt lið, auðvitað kíkir maður á hvað Þórsarar gera og önnur lið en ég reyni frekar að hugsa um okkur og hafa þá rétt stemda en auðvitað var ég búinn að sjá tvo þrjá leiki með þeim.“

,,Við fögnum vel í dag en við erum klárir í það á æfingu á mánudaginn að við verðum að vera fókuseraðir í næstu viku, við fáum ekkert fyrir næsta verkefni sem við gerðum í dag.“