Íslenska liðið fær hæstu einkunn blaðamanna Daily Mail eftir riðlakeppnina á Evrópumótinu í Frakklandi sem nú stendur yfir. Þar er öllum 24 þátttökuþjóðunum sem hófu leik gefnar einkunnir sem taka meðal annars mið af væntingum fyrir mót og frammistöðu á mótinu til þessa.

Aðeins tvær þjóðir fá hæstu einkunn en það eru Ísland og Króatía. Króatar hafa líklega spilað flottasta fótboltann það sem af er móti en þeir lönduðu sem kunnugt er sigri í sterkum D-riðli eftir frábæran sigur á Spánverjum, 2-1, í síðasta leik sínum í riðlinum.

En íslenska liðið fær einnig frábæra dóma í umfjöllun Dail Mail. „Fámennasta þjóðin á EM en líklega vinsælasta liðið í keppninni, þökk sé frábærri viðleitni, stórkostlegum lýsingum (Gumma Ben) og þeirri staðreynd að þjóðin hatar Cristiano Ronaldo. Skemmtilegir, ósigraðir og munu veita Englendingum harða keppni í 16-liða úrslitunum. Þetta hefur verið frábær keppni fyrir íslenska liðið sem er í fyrsta sinn á stórmóti,“ segir í umsögn Daily Mail.

Ísland og Króatía fá bæði A* í einkunn sem er hæsta mögulega einkunninn en tvær þjóðir fá einnig einkunnina A, það er Norður-Írland og Ungverjaland. Wales fær einkunnina A-. Pólland og Ítalía fá B+ á meðan Slóvakar, Þjóðverjar, Albanar og Írar fá einkunnina B. Sviss fær einkunnina B-.

Fjölmargar öflugar knattspyrnuþjóðir eru í hópi þeirra sem fá einkunnina C. Frakkar fá C+ en England, Spánn, Belgía og Portúgal fá C-. Rúmenar og Tyrkir fá einkunnina D en Svíþjóð og Tékkland falla með stæl, fá bæði einkunnina E. Lægstu einkunnina, F, fá hins vegar Úkraína, Rússland og Austurríki, en öll þrjú liðin féllu úr leik eftir riðlakeppnina og stóðu engan veginn undir væntingum.