Kötturinn Kevin var aðeins fjögurra vikna þegar hann fannst illa á sig kominn á bílastæði á ónefndum stað í Bandaríkjunum. Honum var komið í hendurnar á dýralækni sem taldi víst að Kevin myndi ekki lifa lengi.

„Mér var sagt að ef hann væri heppinn myndi hann lifa þar til hann yrði sex mánaða,“ segir Tailah, eigandi Kevins og dýrahjúkrunarfræðingur, á vefnum Bored Panda.

„Ég sagði við sjálfa mig að jafnvel þótt hann myndi deyja myndi ég veita honum alla mína aðstoð og ást.“

En síðan þá eru liðin fjögur ár og Kevin er við góða heilsu í dag. Hann þjáist af því sem kallað er á fræðimálinu Hydrocephalus, eða vatnshöfuð. Um er að ræða býsna alvarlegan kvilla sem getur haft áhrif á sjón, heyrn og starfsemi heilans.

Af þessari ástæðu lítur Kevin ekki út eins og aðrir kettir, en hann er fjörugur, elskar að leika sér og á stóran aðdáendahóp ef marka má Instagram-síðu hans sem tólf þúsund manns fylgja.

„Hann er mikill karakter og virðist mjög hamingjusamur. Ég er mjög ánægð með þá ákvörðun að hafa veitt honum tækifæri – tækifæri sem hann greip með báðum framloppunum.“ Hér að neðan má sjá nokkrar myndir af Kevin, kettinum sem virðist alltaf vera hissa.