Það er nóg að gera hjá helstu leikurum þessara vinsælu þátta
Leikarahópurinn úr Downton Abbey vann til fjölda viðurkenninga fyrir leik sinn í þáttunum, enda einvalalið þar á ferð. Maggie Smith var tvöfaldur Óskarsverðlaunahafi og heimsfræg áður en hún tók að sér hlutverk Violet Crawley, en meðleikarar hennar voru ekki eins þekktir. Það hefur sannarlega orðið breyting á því og tilboðin streyma til leikaranna. Heimsbyggðin hefur dálæti á leikurunum úr Downton Abbey.
Michelle Dockery (Mary Crawley) leikur í sjónvarpsmyndinni Good Behavior þar sem hún leikur konu sem losnar úr fangelsi og kemst í kynni við hættulegan mann. Hún fer einnig með hlutverk í kvikmyndinni The Sense of an Ending sem byggð er á bók eftir Julian Barnes. Charlotte Rampling og Jim Broadbent leika sömuleiðis í myndinni. Önnur kvikmynd sem Dockery leikur í er Consider Yourself, söngleikur um tónskáldið Lionel Bart sem er höfundur söngleiksins Oliver. Geoffrey Rush, Stephen Fry og Olivia Colman eru meðal annarra leikara.
Laura Carmichael sem lék Edith, systur Mary, er nú að leika á sviði í London í leikriti eftir Jean Genet. Hún fer með aukahlutverk í kvikmyndinni A United Kingdom og hennar bíður hlutverk í breskri sjónvarpsmynd í átta þáttum, spennutryllinum Marcella, en handritshöfundurinn er Hans Rosenfeld, handritshöfundur Brúarinnar.
Hugh Bonneville (Crawley jarl) mun senn sjást í Viceroy’s House ásamt Gillian Anderson, en sögusviðið er Indland árið 1947. Elizabeth McGovern (Cora Crawley) leikur í kvikmyndinni Showing Roots á móti Adam Brody.
Joanne Froggatt (Anna Bates) leikur raðmorðingjann Mary Ann Cotton í sjónvarpsþáttunum Dark Angel. Þrjár kvikmyndir eru svo í farvatninu. Brendan Coyle (John Bates) fer með stórt hlutverk í The Rising um páskauppreisnina á Írlandi, og sést einnig í kvikmyndunum Me Before You og Unless.
Lily James (lafði Rose) hefur átt mikilli velgengni að fagna eftir leik sinn í Downton Abbey. Hún var heillandi Öskubuska í mynd Kenneth Branagh og lék Natöshu í bresku framhaldsþáttunum Stríði og friði eftir sögu Tolstojs. Hún leikur Elizabeth Bennet í Pride and Prejudice and Zombies, er í The Kaiser’s Last Kiss, sem gerist í Hollandi á tímum seinna stríðs, og mun sjást í kvikmyndinni Baby Driver ásamt Jamie Fox og Kevin Spacey.
Maggie Smith (Violet Crawley) er í smáhvíld eftir leik sinn í The Lady in The Van en hún hlaut Golden Globe tilnefningu fyrir leik sinn. Hún mun örugglega ekki verða verkefnalaus því hún er gríðarlega eftirsótt leikkona, orðin 81 árs.
