Söngkonan Britney Spears er frjáls eins og fuglinn eftir að hún varð aftur sjálfráða árið 2021, en þá hafði hún verið sjálfræðissvipt frá árinu 2008 vegna geðhvarfasýki. Britney er frelsinu fegin en nú telja ástvinir hennar að frelsið sé að reynast henni fjötur um fót. Hún sé nefnilega að brenna í gegnum auðæfi sín á methraða og hún komin í verulega skuld við hið opinbera.

TMZ greinir frá því að Britney skuldi nú rúmlega 77 milljónir í vangreidda skatta og opinber gjöld. Ástvinir óttast að Britney sé að fara á hausinn og gæti það farið svo að hún hreinlega endi heimilislaus.

Heimildamaður segir:

„Fólkið í kringum Britney er verulega áhyggjufullt því þetta varðar ekki bara einn reikning frá skattinum eða slæman mánuð. Peningarnir hafa streymt út í langan tíma og hún er loks að fá að finna fyrir því. En í hvert sinn sem einhver reynir að koma vitinu fyrir hana hvað fjármálin varðar þá leiðir hún það hjá sér og lætur eins og fólk sé galið að óttast það að hún verði blönk.“

Britney hefur verið að njóta frelsisins í botn. En það kostar. Hún hefur varið gífurlegum fjárhæðum í lúxusferðalög þar sem hún er ekki bara að borga fyrir sjálfa sig heldur fyrir alla ferðafélaga sína sem gjarnan eru margir. Henni finnst minnsta mál að eyða milljónum í einkaflug þar sem hún ferjar föruneyti sitt til Mexíkó þar sem hún eyðir fleiri milljónum í lúxusgistingu fyrir hópinn. Hún hikar svo ekki við að nýta herbergisþjónustu, fara í verslunarferðir og skella sér í heilsulindir.

„Hún heimtar að lifa lífinu eins og hún sé enn á toppnum, þar með talið með því að borga fyrir alla svokölluðu vini hennar sem virðast aldrei láta hana í friði.“

Hún sé nú farin að eyða eftirlaunasjóði sínum og sparnaði, búin að veðsetja heimili sitt og hefur steypt sér í skuldir.

Sjálf telur Britney að skatturinn hafi hana fyrir rangri sök. Einhver hljóti að hafa gert vitleysu einhvers staðar. Hún hefur ákveðið að þræta fyrir skattskuld sína.

Ástvinir hennar telja þó að skattskuldin sýni að staðan sé í raun verri en fólk hefur óttast.

Hagur söngkonunnar mun líklega vænkast þegar hún fær greitt fyrir kvikmynd sem byggir á æviminningum hennar en þessi greiðsla mun að sögn heimildarmannsins ekki ná að dekka skuldir hennar.

„Ekki nema eitthvað breytist bráðlega þá á hún á hættu að brenna í gegnum allt sem hún á eftir og missa húsið sitt.“