Almenn notkun flugelda er leyfð dagana 28. desember og fram til 6. janúar. Notkun flugelda er þó bönnuð seint á kvöldin og yfir nóttina. Nánar tiltekið má ekki skjóta upp flugeldum eftir kl. 22 og fram til 10 að morgni. Undantekning frá þessu er nýársnótt, en þá má skjóta upp.

Lögreglan á höfuðborgarsvæðinu minnir á reglur um notkun flugelda og brýnir almenning til að sýna varkárni. Tilkynningin er eftirfarandi:

„Nú þegar áramótin eru fram undan er ekki úr vegi að rifja upp nokkur mikilvæg atriði sem snúa að skoteldum. Í reglugerð um skotelda segir t.d. að á því tímabili sem almenn notkun skotelda er leyfð, 28. desember til 6. janúar, er meðferð þeirra þó alltaf bönnuð frá kl. 22.00 til kl. 10.00 daginn eftir að undanskilinni nýársnótt. Óheimilt er að breyta á nokkurn hátt skoteldi þannig að hann hljóti aðra eiginleika en framleiðandi hans ætlaðist til. Við meðferð og vörslu skotelda skal ítrustu varúðar gætt og ætíð farið eftir skráðum leiðbeiningum. Við brennu og í næsta nágrenni við hana er öll meðferð flugelda og annarra skotelda sem hætta stafar af vegna ferils þeirra eftir tendrun bönnuð. Þar er aðeins leyfilegt að nota stjörnuljós og blys, þó ekki skotblys.

Að síðustu vill Lögreglan á höfuðborgarsvæðinu hvetja alla til að nota þar til gerð hlífðargleraugu þegar flugeldar, bálkestir og brennur eru annars vegar.“