Ingibjörg Einarsdóttir hefur hafið söfnun fyrir vinkonu sína, Maríu Ericsdóttur, sem missti 13 ára dóttur sína í bílslysi í Suður-Afríku síðastliðinn miðvikudag. Föðuramma dótturinnar lést einnig í slysinu og faðir dótturinnar liggur þungt haldinn á spítala. Voru þremenningarnir á leið til að hitta son Maríu og dvelja hjá honum yfir jólin.

María og Ingibjörg eru tvær af þremur mæðrum sem stigu fram í viðtölum fyrr á árinu, en allar sendu þær syni sína í meðferð í Suður-Afríku sökum úrræðaleysis hér heima. Þriðja móðirin er Jóhanna Eivinsdóttir.

Hér er færsla Ingibjargar í heild sinni, reikningsnúmer sem er á nafni Maríu er neðst í fréttinni:

„Eins og alþjóð veit gripum við, mæður drengja með fíknivanda, til þess örþrifaráðs að senda þá til Suður-Afríku í meðferð vegna úrræðaleysis á íslandi. Verkefni sem hefur kostað okkur bókstaflega allt.

Nú hefur María vinkona mín misst yngstu dóttur sína í bílslysi í Suður Afríku, en stúlkan fór út með föður sínum og ömmu að heimsækja bróður sinn og ætluðu þau að eyða jólunum með honum. Harmurinn er ólýsanlegur.

María fór til Suður-Afríku á föstudag með fjölskyldu sinni til að færa syninum þessar hræðilegu fréttir og sækja látna dóttur sína. Faðir drengsins liggur enn þungt haldinn á spítala og þarf líklega langa endurhæfingu lifi hann af. Amma drengsins lést einnig í slysinu og hana þarf líka að flytja heim.

Til að standa straum af kostnaði og til að létta vinkonu minni lífið á þessum erfiðu tímum viljum við sem stöndum henni næst efna til söfnunar í hennar nafni.

Það síðasta sem hún þarf á að halda núna er að hafa fjárhagsáhyggjur, bæði vegna kostnaðar við áframhaldandi meðferð fyrir drenginn og kostnaðar sem fellur á hana vegna þessa óbærilega harmleiks.

Ég vil biðla til allra sem geta að leggja hönd á plóg, hvort sem það er stórt eða smátt.

Samtakamáttur skilar miklu og margt smátt gerir eitt stórt.

Reikningsnúmerið hennar Maríu er:

Kennitala 241178-4049

Reikningur 2200-26-095108 

Vinsamlegast deilið sem víðast. Með von um góðar viðtökur.

Með sorg í hjarta.

Ástarkveðjur, Ingibjörg Einarsdóttir“