Danska póstþjónustan, PostNord, mun bera út sitt síðasta bréf þann 30. desember næstkomandi. Rafvæðing bréfa hefur valdið því að það svarar ekki kostnaði að bera út bréfpóst lengur.
Um 1500 póstkassar verða teknir niður og um 1500 starfsmönnum PostNord sagt upp vegna breytinganna. Í stað bréfpósts verður öll áhersla félagsins lögð í flutning pakka. Líkt og annars staðar hefur netverslun aukist mikið í Danmörku á undanförnum árum.
Eru þetta mikil tímamót því að bréf hafa verið borin út í um 400 ár í Danaveldi. Fólk getur keypt sér hluta af þessari sögu en póstkassarnir hafa verið settir á sölu og kosta um 2000 danskar krónur hver, eða tæplega 40 þúsund íslenskar krónur. 1000 kassar seldust upp í desember en fleiri verða settir á sölu í janúar.
PostNord segir að ónotuð frímerki verði endurgreidd í einhvern tíma. Enn þá verður hægt að senda bréf með þjónustu einkafyrirtækisins Dao.
