Í danska blaðinu Politiken er því velt upp hvort að hegðun Donald Trump gæti ýtt Íslandi yfir línuna í átt til ESB aðildar. Trump hafi gert Bandaríkin að bæði ófyrirsjáanlegu og óáreiðanlegu bandalagsríki á sviði varnarmála og efnahagsmála.
Í grein sem Claus Blok Thomsen, fréttaritari, skrifar í Politiken á fimmtudag er því velt upp hvort að hegðun Donald Trump geti breytt áratugalangri andstöðu Íslendinga við fulla aðild að Evrópusambandinu.
Eins og flestir vita hefur ríkisstjórnin boðað atkvæðagreiðslu um aðildarviðræður við Evrópusambandið á þessu kjörtímabili. Skoðanakannanir sýna að fleiri eru fylgjandi þeim en andvígir.
En hvers vegna er það? Thomsen nefnir hegðun Donald Trump Bandaríkjaforseta í þessu samhengi. Hegðun hans hafi sett allt vestrænt samstarf á hálan ís, bæði varnarsamstarf og viðskiptasambönd.
Á slíkum tímum, þegar stórveldi takast á, verði hagsmunir lítilla ríkja undir. Því telji Íslendingar mikilvægt að finna sér trausta bandamenn. Áhugi Trump á að verja Evrópu sé bersýnilega lítill og að Ísland hafi orðið fyrir barðinu á tollastefnu hans líkt og aðrir.
„Á sama tíma finnur Ísland fyrir afleiðingum þess að vera utan ESB því landið er lokað frá viðskiptum við ESB á nokkrum sviðum,“ segir Thomsen. Þetta sé byrjað að skaða efnahagslega hagsmuni Íslands og valda deilum við ESB.
