Bruno Fernandes hefur greint frá því að hann vilji leika á Spáni eða á Ítalíu ef hann yfirgefur Manchester United og sendi um leið enn ein skilaboðin til yfirstjórnar félagsins.

Fyrirliði United vakti mikla athygli á dögunum þegar hann fullyrti í viðtali við portúgalska miðilinn Canal 11 að félagið hefði viljað selja hann til Sádi-Arabíu síðasta sumar. Fernandes sagðist hafa orðið sár yfir því að forráðamenn United hefðu verið tilbúnir að láta hann fara, en sakaði þá jafnframt um að skorta hugrekki til að ganga alla leið.

Í seinni hluta viðtalsins, sem Canal 11 birti síðar, nefndi Fernandes Spán og Ítalíu sem mögulega áfangastaði ef hann yfirgefur Old Trafford. Hann lagði þó áherslu á að hann vilji vera áfram hjá United svo lengi sem félagið vilji hafa hann.

„Mig langar að upplifa spænsku deildina og berjast um stóra titla á Ítalíu. Ég á sterk tengsl við Ítalíu, dóttir mín fæddist þar,“ sagði Fernandes.

Hann viðurkenndi einnig að hafa hugleitt endurkomu til Portúgals. „Að snúa aftur þangað sem maður var einu sinni hamingjusamur getur spillt þeirri mynd sem maður skildi eftir,“ sagði hann og bætti við að Sporting væri hans fyrsta val af virðingu og væntumþykju.