Donald Trump Bandaríkjaforseti er bálreiður eftir að kjörnir fulltrúar demókrata, sem jafnframt eru uppgjafahermenn, beindu því til hersins að hermönnum beri skylda til að virða að vettugi ólöglegar fyrirskipanir. Trump segir þá hafa hvatt með beinum hætti til uppreisnar sem sé glæpur sem varði við dauðarefsingu.
Forsetinn hefur farið mikinn undanfarnar klukkustundir á samfélagsmiðli sínum TruthSocial:
„UPPREISNARHVETJANDI HEGÐUN, sem varðar við DAUÐAREFSINGU.“
Hann segist ekki ætla að umbera þessa hegðun. Þetta séu föðurlandssvikarar sem eigi heima í fangelsi. Forsetinn hefur einnig deilt færslum frá öðrum um málið. Þar segir einn:
„HENGJA ÞÁ, GEORGE WASHINGTON MYNDI GERA ÞAГ
„UPPREISN, LANDRÁГ
Trump segir að handtaka ætti alla demókratana enda ekki hægt að líða svona hegðun. Það þurfi að gera fordæmi úr þessum aðilum.
Sex þingmenn demókrata eiga hlut að málinu, Elissa Slotkin, Mark Kelly, Jason Cros, Maggie Goodlander, Chris Deluzio og Chrissy Houlahan. Þau birtu í dag sameiginlega yfirlýsingu þar sem þau segja að stjórnarskrá Bandaríkjanna sé í hættu og að árásin komi innan frá. Forsetinn sé nú að setja hermenn í óþægilega stöðu, enda sé hollusta hersins við stjórnarskrána en ekki við þjóðhöfðingjann. Eins standi hermenn nú frammi fyrir því að vera sendir í aðgerðir gegn sínum eigin samlöndum.
