Ungur maður fékk sér húðflúr á miðjum tónleikum íslensku söngkonunnar Laufeyjar fyrir skemmstu. Það endaði hins vegar með því að hann þurfti að fara á spítala.
Maðurinn, sem heitir Xiu, og kallar sig Xiu Shogaze greindi frá hremmingum sínum í færslum á samfélagsmiðlunum X og Instagram. Hafa nærri 30 milljónir manns fylgst með þessu.
„Ætti ég að hafa áhyggjur? Þetta er hryllilega sárt,“ sagði Xiu í einni færslunni nú í október.
Xiu fór á tónleika með Laufey nú í mánuðinum á ótilgreindum stað, en hún er nú á tónleikaferðalagi um Norður Ameríku. Hann ákvað að fá sér húðflúr á miðjum tónleikunum.
„Ég fékk mér flúrið á klósettinu á Laufeyjar tónleikum,“ segir Xiu aðspurður um hvar hann hafi látið gera þetta.
Xiu fékk sér hins vegar ekki Laufeyjar tattú heldur flúr innblásið af annarri söngkonu, Charli XCX, það er með orðinu „Brat“ sem hún gerði að sínu.
Fljótlega kom hins vegar ígerð í flúrið og breiddist sýkingin hratt út og versnaði mikið. Eins og sést á myndum sem Xiu birti varð allur framhandleggurinn eldrauður, hann flagnaði mikið og ljótar blöðruður mynduðust alveg fram á lófa og fingur.
Síðar byrjaði handleggurinn að bólgna upp og þá ákvað Xiu að fara á spítala til að láta athuga þetta. Eins og sést á einni myndinni sem hann birti var settur eins konar hólkur yfir allan framhandlegginn og höndina.
Xiu er ágætlega stór áhrifavaldur á samfélagsmiðlum og er með um 70 þúsund fylgjendur. Höfðu margir þeirra áhyggjur af heilsu hans eftir þessa eldraun.
„Þessi maður er gangandi lífefnavopn út af þessu brat tattúi,“ sagði einn fylgjendanna í athugasemdum við færslu Xiu.
Að lokum varð húðflúrið, sem er mosagrænt á litinn, upphleypt og býst Xiu við því að fá varanlegan skaða af.
„Það er allt í lagi með mig samt, þetta er búið að vera mikill lærdómur,“ sagði hann. „Kannski reyni ég aftur eftir eitt ár eða svo.“
Eins og segir í frétt The Tab um málið þá myndast sýkingar í húðflúri einkum vegna ofnæmis eða vegna þess að það var flúrað á á óhreinum stað. Verður að teljast að seinni skýringin sé líklegri í þessu tilfelli.
Auk áðurnefndra tilfella getur byrjað að grafa í húðflúrinu og viðkomandi getur fengið hita. Sýkingar af þessum toga geta leitt til dauða, einkum ef viðkomandi er með viðkvæmt ónæmiskerfi.
