Í nýrri tilkynningu frá aðgerðastjórn lögreglunnar á höfuðborgarsvæðinu er fólk á svæðinu eindregið hvatt til að halda sig heima og vera ekki á ferðinni að nauðsynjalausu. Þeir sem eru þegar farnir að heiman er hvattir til að fara heim sem allra fyrst.

Fram kemur að þetta sé gert vegna áframhaldandi snjókomu á höfuðborgarsvæðinu.

Gul viðvörun vegna veðurs sé í gildi í umdæminu, en hún muni breytast í appelsínugula viðvörun kl. 17, en áfram sé spáð mikilli snjókomu eða slyddu með lélegu skyggni. Fólk sem farið hafi að heiman í morgun sæe beðið um að huga að heimferð sem allra, allra fyrst og mjög gott væri ef fólk sé komið til síns heima fyrir kl. 15) því færðin og veðrið eigi bara eftir að versna eftir því sem líður á daginn.

Áfram megi búast miklum samgöngutruflununum og fólk sæe hvatt til að sýna aðgát og fylgjast með veðurspám. Þetta sé dagurinn og kvöldið til að vera heima og hafa það notalegt, en ekki ana út í umferðina og sitja þar fastur! Fólk sé beðið um að sækja ekki þjónustu í dag sem geti auðveldlega beðið betri tíma, t.d. sundlaugar og bókasöfn, en hvatt sé til að þeim verði lokað. Nauðsynlegri þjónustu verði hins vegar haldið úti, t.d heilbrigðisstofnanna og ýmissi velferðarþjónusta.

Að lokum er það ítrekað, eins og gert hefur verið í fjölda tilkynninga frá embættinu í dag, að ökumenn á vanbúnum ökutækjum eigi alls ekki að vera í umferðinni í þessari miklu vetrarfærð:

„Þrátt fyrir aðvaranir hefur borið mikið á því í dag og hefur það ollið mjög miklum vandræðum. Vanbúin ökutæki verða fjarlægð á kostnað eigenda. Best er samt að allir sem mögulega geta haldi sig heima á meðan veðrið gengur yfir, óháð öllum dekkjabúnaði ökutækja.“