Alvarlegt umferðarslys varð nú á sjöunda tímanum í morgun, á Suðurlandsvegi, skammt vestan Lómagnúps, þar sem bifreið með tveimur aðilum hafnaði utan vegar.

Í tilkynningu frá lögreglunni á Suðurlandi kemur fram að lögregla, sjúkraflutningar, þyrla Landhelgisgæslu, slökkvilið og björgunarsveit voru boðuð á vettvang, ásamt rannsóknarnefnd samgönguslysa.

Ökumaður og farþegi voru flutt með þyrlu Landhelgisgæslu til Reykjavíkur. Vísir greindi frá í morgun að þeir hefðu verið erlendir.

Ekki er hægt að segja til um ástand hinna slösuðu en slysið er til rannsóknar hjá lögreglunni á Suðurlandi.