Varnarmálaráðherra Bandaríkjanna, Pete Hegseth, hélt í dag dularfullan fund með öllum helstu hersforingjum bandaríska hersins. Nokkur leynd var yfir efnistökum fundarins sem var boðað til fyrir helgi. Ráðherrann skikkaði alla hersforingja til að mæta í eigin persónu, en þessir aðilar gegna herþjónustu víða um heiminn. Fundurinn þótti fordæmalaus og vakti fundarboðið töluverðan ugg. Nú er komið á daginn að fyrst og fremst ætlaði Hegseth að nýta fundinn til að kynna nýjar áherslur fyrir herinn. Hann vill ekki sjá neitt skegg í hernum, enga feita hershöfðingja, stríðsanda og engan pólitískan rétttrúnað.
Hegseth fór með eldræðu þar sem hann lagði áherslu á mikilvægi stríðsanda (w. warrior ethos) í hernum. Með stríðsandann að vopni geti herinn verið búinn undir hvað sem er hvenær sem er. Hann vill breyta menningunni innan ráðuneytis síns sem hann kýs að kalla stríðsmálaráðuneytið. Til að heiðra stríðsandann ætlar Hegseth að gera öllum í hernum skylt að standast þrekpróf og eins gerir hann kröfur um að hermenn passi upp á ímynd hersins með því að huga að snyrtimennsku.
„Ekkert skegg, sítt hár eða yfirborðskennd tjáning einstaklingshyggju. Við ætlum að klippa okkur, raka og uppfylla kröfur,“ sagði ráðherrann og bætti við að Bandaríkin séu ekki með her sem sé uppfullur af heiðingjum frá Norðurlöndum. „Tími ófaglegs útlits er á enda. Engin fleiri skegg.“
Donald Trump Bandaríkjaforseti flutti einnig ræðu en bæði hann og Hegesth tóku fram að sökum pólitísks rétttrúnaðar hefði herinn fyllst af vanhæfum hermönnum. Sá tími sé liðinn. Nú verði ekki tekið inn í herinn á grundvelli inngildingar, jafnréttis og fjölbreytni heldur aðeins á grundvelli verðleika. Hegseth tók fram að ef nýjar kröfur hans til hermanna útiloki konur þá bara sé það þannig. Kröfurnar hans séu ekki kynbundnar heldur miði að því að tryggja að hermenn hafi þann líkamlega styrk og það þrek sem þarf til að berjast. Til þessara eiginleika þurfi að gera ríkar kröfur og ef konum tekst að uppfylla þær þá sé það frábært og ef ekki eigi þær ekkert erindi í herinn. Að sama bragði útiloki kröfurnar auma karlmenn. Herþjónusta er alvöru mál. Hún snýst um stríð, átök, líf og dauða.
Hann tók eins fram að það að gera strangar kröfur geti ekki talist eitruð vinnustaðamenning. Þvert á móti sé það eitrað að stofna hermönnum í hættu með því að slá af hæfniskröfum. Hegseth benti svo á að þeir sem kæri sig ekki um þessa stefnubreytingu ættu að gera það heiðvirða og segja sig úr hernum.
Trump lagði til að herinn myndi æfa sig með því að stilla til friðar í „hættulegum“ borgum Bandaríkjanna á borð við Chicago, San Francisco, New York, Portland og Los Angeles. Rétt er að geta þess að þessar borgir eiga það sameiginlegt að ríkisstjórar þeirra koma úr demókrataflokknum.
„Þetta verður stór hluti starfsins fyrir suma hérna inni. Þetta er líka stríð. Þetta er stríðið að innan. Að stjórna svæðunum í kringum landamæri okkar skiptir sköpum fyrir þjóðaröryggi. Við getum ekki hleypt þessu fólki inn,“ segir forsetinn og vísar til innflytjendamála sem honum þykir demókrataríkisstjórarnir líta of léttum augum.
Forsetinn segir að „friður í gegnum styrk“ sé aftur orðið meginstef hersins. Heimurinn muni aftur bera virðingu fyrir Bandaríkjunum. Eins tók hann fram að til standi að selja gífurlegt magn af hergögnum til annarra ríkja. Svo mikið að hergagnaframleiðendur þurfi að spýta í lófana enda sé Trump búinn að finna kaupendur.
Fundurinn er enn yfirstandandi en The Guardian fylgist með í vakt sinni.
