Sumarævintýri elgsins Emils er nú á enda, en yfirvöldum í Austurríki tókst að handsama hann. Emil er nú kominn með GPS-staðsetningartæki og var honum sleppt við landamæri Austurríkis og Tékklands, en á því svæði búa um 10-20 elgir og er vonast til að Emil verði tekinn inn í þeirra hóp.
Emil sló í gegn á samfélagsmiðlum í sumar, en fólk hefur keppst við að birta myndir af ævintýralegu ferðalagi hans. Fyrst sást til elgsins nærri bænum Ludgerovice í Tékklandi, en talið er að þar áður hafi hann haldið sig í Póllandi.
Emil hefur heldur betur lagt land undir klauf og ráfað í gegnum 60 bæi og þorp í fjórum löndum – Póllandi, Tékklandi, Slóvakíu og Austurríki. Hann er talinn hafa ferðast hátt í 500 kílómetra. Hann hefur tölt yfir vegi, lestarteina og synt yfir ár. Hann hefur mætt á minnst tvo menningarviðburði, þar með talið þungarokkshátíð í Suður-Moravíu. Þó nokkrir Facebook-hópar hafa verið stofnaðir til að fylgjast með ferðum Emils í sumar og hafa fyrirtæki brugðið á leik og nýtt myndvinnsluforrit eða gervigreind til að bæta Emil inn á auglýsingar hjá sér á samfélagsmiðlum. Hann er því orðinn sannkölluð samfélagsmiðlastjarna.
Á miðöldum mátti finna mikið af elgum í skógum Tékklands en sökum ofveiða hurfu þeir nánast með öllu. Tilraunir hafa verið gerðar í gegnum aldirnar til að koma aftur upp stofni en þær gengu brösuglega allt þar til á áttunda áratug síðustu aldar. Í dag er talið að um 50 elgi sé að finna í Tékklandi, töluvert færri en á meintum heimaslóðum Emils í Póllandi þar sem finna má tugi þúsunda elga.
Nú vona yfirvöld að Emil hætti flakkinu og festi rætur í Tékklandi með elgunum þar.
