Drengirnir tóku upp á því að pissa í svokallaðan „hotpot“ í útibúi kínversku veitingastaðakeðjunnar Haidilao í borginni. Þeir tóku upp myndband af þessum gjörningi sínum og vakti það mikla athygli á kínverskum samfélagsmiðlum í febrúar síðastliðnum.
DV greindi frá því í mars að Haidilao hefði ákveðið að greiða 4.000 viðskiptavinum sínum bætur eftir að myndbandið fór á flug. Sagði fyrirtækið í yfirlýsingu við það tilefni að það skilji fullkomlega hversu óþægilegt málið væri fyrir viðskiptavini. Ekki sé hægt að bæta þeim þetta að fullu en fyrirtækið muni gera sitt besta til að taka ábyrgð á málinu.
Sjá einnig: Mörg þúsund viðskiptavinir fá bætur – Tveir menn pissuðu í matinn
Fyrirtækið stefndi drengjunum, eða öllu heldur foreldrum þeirra þar sem þeir voru ekki orðnir lögráða, og hefur dómari nú ákvarðað að þeir þurfi að greiða samtals rúmar 37 milljónir króna vegna málsins.
Fyrirtækið fór fram á mun hærri bætur, um 350 milljónir króna, á þeim grundvelli að fyrirtækið hefði greitt viðskiptavinum ríflegar bætur vegna málsins. Um 4.000 viðskiptavinir hefðu fengið endurgreiðslur og bætur eftir að málið kom upp.
Dómstóllinn úrskurðaði að athafnir ungu mannanna hefðu brotið gegn eignarrétti og orðspori veitingastaðarins og tók fram að hegðun þeirra hefði mengað útbúnað á veitingastaðnum og vakið reiði almennings. Sem betur fer munu engir viðskiptavinir keðjunnar hins vegar hafa neytt súpunnar sem búið var að pissa í.
Haidilao-veitingastaðakeðjan hefur vaxið hratt á undanförnum árum og eru í dag yfir þúsund útibú um allan heim.
