Daniel Farke hefur staðfest það að sóknarmaðurinn Mateo Joseph vilji komast burt frá félaginu í sumar.
Joseph hefur neitað að hitta liðsfélaga sína á undirbúningstímabilinu en hann er ákveðinn í að kveðja Leeds og það sem fyrst.
Farke, stjóri Leeds, hefur rætt við leikmanninn og bað hann um að snúa aftur til æfinga en það skilaði litlum árangri.
Joseph er 21 árs gamall sóknarmaður en hann skoraði aðeins þrjú mörk í 41 leik fyrir Leeds á síðustu leiktíð er liðið tryggði sér sæti í efstu deild.
Hann hefur leikið með Leeds frá 2022 en hann er uppalinn á Spáni og var áður hjá Espanyol og Racing Santander.
,,Ég hef rætt hreinskilnislega við hann um stöðuna og mælti með því að hann myndi láta eins og atvinnumaður á meðan við finnum lausn á málinu,“ sagði Farke.
,,Hann sagðist ekki vera í andlegu ástandi til að gera það. Hvað get ég gert? Ég get ekki hringt í lögregluna og látið draga hann hingað.“
