Ofurhuginn Felix Baumgartner, sem lést í svifvængjaslysi á Ítalíu í gær, er talinn hafa verið látinn áður en hann brotlenti harkalega i hótelgarði í bænum Porto Sant´Elpidio á Ítalíu. Er talið að Baumgartner, sem var 56 ára gamall, hafi fengið hjartaáfall í háloftunum og í kjölfarið hrapað til jarðar.
Kona sem starfaði á hótelinu lenti undir svifvængjunni og slasaðist illa, meðal annars á hálsi. Litlu mátti víst muna að hópur krakka hefði einnig orðið undir svifvængju Baumgartner.
Baumgartner öðlaðist frægð fyrir fjölmörg áhættuatriði sem hann framkvæmdi í gegnum árin. Hans þekktasta atriði var þegar hann sveif upp í ytri mörk gufuhvolfsins í helíumblöðru og stökk til jarðar úr 39 kílómetra hæð í fallhlíf árið 2012. Það met stendur enn sem mesta hæð sem nokkur hefur stokkið úr auk þess sem Baumgartner var fyrstur manna til að rjúfa hljóðmúrinn án þess að vera á vélknúnu farartæki.
