Nýjar upplýsingar um banvænt flugslys Air India, þar sem 260 manns létust í júní, benda til þess að flugstjóri vélarinnar hafi vísvitandi orsakað slysið með því að slökkva á eldsneytisrofum vélarinnar strax eftir flugtak.
Samkvæmt upplýsingum úr svarta kassa vélarinnar var fyrsti eldsneytisrofi vélarinnar – staðsettur við hægri hönd flugstjórans – færður í „cut off“ stöðu aðeins þremur sekúndum eftir flugtak. Slökkt var á öðrum rofa aðeins einni sekúndu síðar. Þetta kemur fram í mati bandarískra embættismanna sem hafa yfirfarið gögn rannsóknarnefndar Indlands. Wall Street Journal greinir frá.
Haft er eftir flugöryggissérfræðingnum Byron Bailey að ekki sé hægt að virkja umrædda rofa fyrir slysni. „Þeir þurfa líkamlegt afl – þú þarft að lyfta þeim upp, draga þá yfir og þrýsta niður. Það verður að hafa verið flugmaður sem gerði þetta – og líklegast flugstjórinn.“
Samkvæmt Bailey bendir allt til þess að sá sem slökkti á rofanum hafi vitað nákvæmlega hvað hann var að gera: „Þrjár sekúndur eftir flugtak er hinn fullkomni tími. Ef þetta hefði verið gert fyrr hefði hinn flugmaðurinn getað brugðist við, og ef seinna hefði vélin haft tíma til að jafna sig. Við teljum að þetta hafi verið sjálfsvíg flugstjórans,“ segir Bailey.
Áður hefur verið greint frá hljóðupptöku úr flugstjórnarklefanum þar sem heyra má annan flugmann spyrja hinn: „Af hverju slökktir þú?“ Svarið sem hann fékk var: „Ég gerði það ekki.“
Samkvæmt Wall Street Journal og bandarískum flugmönnum sem hafa lesið skýrslu indversku rannsóknarnefndarinnar (AAIB), er líklegt að aðstoðarflugmaðurinn Clive Kunder hafi verið of upptekinn við að fljúga til að hafa hreyft rofana. Allt bendir til þess að yfirflugmaðurinn, Sumeet Sabharwal, hafi verið sá sem hafi getað slökkt á rofunum.
Sabharwal var gamalreyndur atvinnuflugmaður, 56 ára á fjölskyldufaðir sem var farinn að íhuga að setjast í helgan stein, á meðan Kunder var aðeins rúmlega þrítugur og enn að byggja upp feril sinn.
